اتخيل انى اصبحت رئيسا لهذه البلد، "أكيد يومى هيختلف" يعنى مش هصحى متأخر زى كل يوم ولا حتى هنام متأخر
بس بيتهيألى هتبأه حياتى مش لذيذه ، طب انا ممكن اتخيل نفسى رئيس لفتره معينه علشان اجرب ،يعنى لو عجبنى الموضوع أكمل معجبنيش أفكنى منه خالص " موضوع التخيل يعنى مش انى اكون رئيس " .
طيب انا هجرب الحكايه دى يوم واحد الاول علشان محجزش اسبوع وارجع اقول يارتنى تبأه مشكله هفضل اسبوع رئيس !!! خليها يوم واحد احسن وخليه يوم اجازه يوم جمعه مثلا يعنى انا هخرج من شغل على شغل لاء خلينى اجرب ابأه رئيس ف يوم اجازته ولا عادى انا حاسس ان اجازته مبتخلصش اصلا " ما علينا ".
طيب انا ممكن اخليه النهارده مثلا اهو يوم اجازه يعنى هصحى براحتى كالعاده
خلينا نبدأ اليوم من اوله يعنى من الساعه 1 صباحاً .
الساعه الواحده صباح يوم 25 يناير.
اجلس انا فى حديقه منزلى ويجلس حولى كلا من زوجتى واولادى جمال وعلاء وزوجاتهم وبالطبع ابنائهم معنا .
جمال : ازيك ياحاج
انا : الله يسلمك يابنى عامل ايه انت واخوك؟
علاء : كلنا بخير طول ما انت بخير .
انا : انا بخير طول ما انتو حواليا ، لمتكوا حواليا دى عندى بالدنيا .
جمال : دا انا بستنى يوم الاجازه ده بفارغ الصبر.
علاء : جمال ..صحيح ، انا سمعت انهم ناويين يعملوا حاجه بكرا ،دول ماليين النت كلام عن حوارات ناوييين يعملوها بكرا
انا : الكلام دا صح يا جمال ؟!
جمال : يابابا انت هتصدق علاء انت عارف انه غاوى هزار .
علاء : لا انا مبهزرش والله يابابا ناويين يقلبوها
جمال : يعنى انت لازم تتكلم ؟؟
انا : ياولاد طمنونى ايه اللى هيحصل ؟ انا مش ناقص دا انا مصدقت يوم اجازه .
علاء : انا هتكلم ياجمال متزعلش منى
جمال : قول يافالح
علاء : جماهير الزمالك ياحاج تخيل عاوزين يضربوا اتوبيس النادى الاهلى وهو رايح التدريب ؟؟
انا : لا حول ولا قوه الا بالله ، طب ودا يابنى معناه ايه ؟
علاء : ولا حاجه يابابا عادى جمهور وبيعبر عن نفسه
انا : آه صحيح انا ناسى ان انت اسمعلاوى ههههههههههههه
جمال : ثوانى ياحاج اكلم تليفون
انا : يابنى مش انت اللى مجمعنا النهارده وقلت سهره عائليه مش طالبه بأه تليفونات
جمال : معلش ياحاج دا حسن شحاته
انا : اذا كان كدا ماشى ....سلملى عليه ياواد
سوزان : انتوا مش هتاكلو الزلابيه دى ولا ايه دا انا اللى عاملاها بأيدى
خديجه : لا والله ياطنط دى تحفه انا مبطلتش اكل منها
انا : انا هقوم انام بأه علشان عضمى مكسر مش عارف من ايه
علاء : ما انت قاعد ياحاج لسه بدرى
انا : بدرى ايه الساعه بأت ثلاته ونص
استيقظت من نومى حوالى الساعه الواحده ظهرا لأجد امامى جمال وعلاء
انا : صباح الخير ياولاد .. ايه فى حاجه ؟
جمال : لا يابابا احنا قلنا نصبح عليك
انا : اصل انا مش متعود لمتكوا دى
علاء : اصلنا كسلنا نروح امبارح قلنا نكمل الاجازه معاك
انا : وياترى مراتك موافقه ع الكلام دا ولا هتقولك فسحنى وعاوزه اخرج وكدا
علاء : لا لا يا بابا طبعا موافقه دى هى اللى قالتلى كدا كمان
انا : طب ياسيدى ربنا يهديكوا لبعض ، والواد ابنك عامل ايه ف دراسته ؟
علاء : مغلبنى
انا : ليه بس ؟؟
علاء : كل يوم يجيلى من المدرسه معيط وأساله بتعيط ليه يقولى العيال ضربونى
انا : هههههههههههه عادى متقلقش
علاء : ازاى ياحاج الواد مش عارف ياخد حقه
انا : اخوك كان كدا وشوفه دلوقتى عامل ازاى
ينظر علاء الى جمال بإستغراب
جمال : ياعلاء دا كان زمان عادى متقلقش
انا : اخوك جمال ياسيدى كان كل يوم يجيلى معيط وأساله دا من ايه يقولى العيال ضربونى شوفه بأه دلوقتى بيخلى الرجاله قبل العيال يعيطوا
علاء : يعنى مقلقش !!؟
انا : لا دا عادى جدا انت بس سيبهولى شويه ، مش مهم ان ابنك بيعيط دلوقتى المهم مين اللى هيعيط فى الاخر
جمال : سامع يابنى الحكم .... أستااااااذ
انا : ناولنى ياواد البدله خلينى اغور
جمال : هتروح فين بس ياحاج ؟
انا : مش النهارده عيد الشرطه هقوم اقول الكلمتين بتوع كل مره
جمال : لسه بااااادرى الساعه لسه اتنين الظهر والنشره بتيجى تسعه بالليل
انا : نشره ! وانا مالى بالنشره ؟
جمال : ماهى كلمتك مبتجيش غير ف النشره فأصبر قولها مره واحده الساعه تسعه وخلاص
انا : اذا كان كدا ماشى .....وسع كدا ياجمال خلينى اقوم اشوف فى ايه ف البلد
علاء : طب ماتيجى نفطر تحت مع ماما والاولاد وبعدين نتفرج ع التليفزيون دا الفيلم اللى انت بتحبه هيجى النهارده
انا : ماشى يكون احسن الواد ابنك دا واحشنى كيك
وفى الصالون امام التليفزيون
انا : مين اللى معاه الريموت ياجمال
علاء : مش عارف استنى اشوفهولك
انا : اهو مع الواد ابنك هاته منه انت عارف ان انا اللى بمسك الريموت هنا ولا ايه ؟
علاء : اه صحيح اتفضل يااحاج
جمال : بعد اذنك ياحاج اشوف حاجه بس
انا : شوف ياسيدى اما نشوف اخرتها
جمال : شكرا
انا : يادى الافلام الاجنبى اللى كلت دماغك يابنى دول عالم فاضيه
جمال : بس عليهم افكار هايله ، اتفضل ياحاج الريموت بتاعك بس ادهولى لما تخلص
انا : لما اخلص بأه يدينى ويديك طوله العمر
وبمرورى على قنوات التليفزيون المختلفه رأيت مالم اكن اتوقع
انا : ايه دا ياجمال ناولنى النظاره كدا انا شايف مظاهره ولمحت كدا زى ما تقول علم مصر!!!
جمال : علم مصر ايه ياحاج تلاقيها لبنان ولا تونس ولا حتى الجزائر
انا : لاء دا علم مصر هو انا تايه عنه ناولنى بس انت النظاره
جمال : ياحاج متقولش كدا الكلام دا لا يمكن يحصل عندنا
انا : يابنى مش علم مصر ابيض واحمر واسود وبالاماره فيه نسر ف النص مش كدا ؟
جمال : آه بس انا مش لاقى النظاره
انا : اقطع دراعى ان ما كنتوا مخبيين عليا حاجه انا قايم اشوف فيه ايه ؟
جمال : يابابا .............
انا : ولا كلمه انا ماشى يعنى ماشى
وفى المكتب
انا : اندهولى سى نضيف والعدلى بيه اما نشوف اخرتها
وفى لحظه اجد نضيف امامى
انا : ايه يابيه فاكرنى نايم على ودنى
نضيف : اصل ....
انا : ولا كلمه يابيه انا عاوز اعرف دلوقتى تفاصيل المظاهره من اول ما بدأت لحد دلوقتى فهمت
نضيف : ثوانى ويكون عند حضرتك تقرير باللى بيحصل
انا : غور يابيه وابعتلى العادلى
العادلى يهمس لنضيف قبل ان يدخل دون ان يعى اننى على مسمع منهم
العادلى : خير ؟ قالك ايه طمنى ؟
نضيف : ادانى كلمتين ف العظم انبسطت ياسيدى ؟ انا كان مالى ومال الحوارات دى ؟ اهم حاجه اتكلم معاه بصراحه هو عارف كل حاجه
العادلى : ربنا يستر
انا : ازيك يابيه ، ايه اللى بيحصل دا ؟
العادلى : ياسياده الريس دول اقليه حبوا يعملوا شغب والوضع تحت السيطره
انا : انت متأكد من كلامك ؟
العادلى : طبعا انا مش عاوز حضرتك تقلق خالص احنا عارفين باللى بيحصل وواخدين كل الاحتياطات
انا : عارفين !!
العادلى : اه طبعا
انا : وملمتوش الدور م الاول ليه ؟
العادلى : مش حضرتك قولت لنا سيبوا الناس تتكلم ؟
انا : ماشى بس بعد كدا اكون عارف باللى بيحصل مش كل دا يحصل من ورايا ! ماشى يابيه؟
العادلى : تمام يافندم
انا : إتكل
اتلفت حولى بحثا عن جمال وما لبث ان ظهر امامى
انا : جمال تعالا هنا عاوزك
جمال : اامرنى ياحاج
انت وراك حاجه دلوقتى
جمال : لا لا حتى لو ورايا معاك
انا : طب تعالا وصلنى علشان اقول الكلمه بتاعه عيد الشرطه
جمال : امرك ياحاج اتفضل قدامى
انا : لا انت الاول يافالح
وفى السياره
انا : انا زعلان منك ياجمال
جمال : ليه بس ياحاج انا مقدرش على زعلك
انا : هقولك بعد الكلمه
جمال : ماشى
انا : الا قولى ايه اخر اخبار المظاهرات ؟؟
جمال : للاسف فى اربعه ماتوا وواحد م الشرطه
انا : ايه ؟؟؟
جمال : معلش بأه هما اللى تزاحموا وداسوا على بعض
انا : لا حول ولا قوه الا بالله
جمال : اهم حاجه تواسى اهاليهم فى كلمتك وتقول اي حاجه كدا عن المظاهرات ... ماشى ؟
انا : ربنا يسهل
وبعد انتهاء المؤتمر
انا : جماااااااااال
جمال : امرك ياحاج
انا : مش عاوز تعرف انا زعلان منك ليه ؟
جمال : ليه بس ياحاج قلقتنى
انا : تانى مره لما يكون الموضوع ليه علاقه بالمنتخب بلغنى مش تسبنى كدا
جمال ينظر الى بإستغراب
قائلا : منتخب !!!!
انا : انت ياواد فاكرنى نايم على ودنى ولا مبفهمش
جمال : قطع لسان اللى يقول كدا
انا : امبارح اخوك يقولى اتوبيس الاهلى وبعدها جالك تليفون من حسن شحاته مش محتاجه يعنى فتاكه
جمال : دا اللى خلاك تقول المتنخب؟
انا : لا يافالح عندك كمان الواد اللى ف المظاهره اللى كان شايل علم مصر
جمال : طب ودا معناه ايه ؟
انا : انت هتستهبل !! هو لو كان من جمهور الاهلى كان رفع علم الاهلى انما علم مصر يبأه اكيد المنتخب يافكيك
جمال ينظر الى مسبهلاً دون ان ينطق ثم يسقط مغشيا عليه وهو يقول " أقنعتنى ياوالدى "
ستااااار
" وبعد ما عشت يوم مكان الريس وتانى يوم اتفرجت ع النشره ولقيت الكلام عادى جدا قررت خلاص انى مش عاوز اكون ريس للبلد دى ولو يعنى حصل وبأيت ريس مش هتردد انى اشوفلى عقد عمل واروح السعوديه بأه "
تعليقات