هو الحب ممكن يعمل إيه فى البنى آدم ؟؟ الحب ممكن يغير الواحد 180 درجه ويخليه بنى آدم تانى .
- الحب ممكن يحببك فى حاجات بتكرهها ، ويبعدك عن حاجات بتحبها
- الحب بيخليك تنسى نفسك وتفتكر دايماً اللى بتحبه
- الحب ممكن يخليك تغيّر حاجات كتير فى شخصيتك
- ممكن يخليك تنام بدرى وإانت مدمن سهر
- تبطّل شُرب قهوه وإنت كييّف قهوه
- تحب المسلسلات التركى وإنت بتكره المسلسلات العربى أساساً
- يخليك تتعلم فن تحريك العرايس أو التطريز وإنت بتلضم الخيط فى الإبره بالعافيه.
الحب ممكن يخليك واحد تانى فى ثوانى من غير ما تحس
- بس لو حبك بالطريقه دى يبأه مستحيل أحبك.
- ماتستغربيش من صراحتى ، أنا بحب شغل الأفلام وكلام الحب اللى لا يودّى ولا يجيب وأحب السهتنه والتسبيل والبربشه والكسفه والخجل والسهر والتوهه اللى بيعملها الحب.
- بس عاوز لما أحبك ماتغيرش أو بمعنى أصح عاوز حبك مايغيرنيش.
- عاوز أحبك وأنا زى ما أنا ... ماأتغيرش
- يعنى بالفطره كدا تلاقينى بحب الحاجات اللى إنتى بتحبيها وبكره الحاجات اللى بتكرهيها.
- بيقولوا الحب "مرض" وأنا عاوزك سليمه :)
- وعاوزك كمان ماتتغيريش علشانى يعنى متعمليش نفسك بتشجعى "ريال مدريد" مثلا إنتى مابتحبيش الكوره أساساً.
ولما تروّحى تفضلى تحفظى أسامى اللعيبه علشان تحسسينى إنك مدمنه كوره.
- انا عاوزك زى ما أنتى ماتتغيريش.
يعنى " أنا زىّ ما " إنتى "وإنتى زىّ ما " أنا "
تعليقات